BAHAN SERMON HKBP RESSORT PANGARIBUAN

MINGGU XVII DUNG TRINITATIS

Evangelium    :   MATEUS 21 : 23-32                                  Epistel : PSALMEN 25 : 1-9                                   

“MANANDA DOHOT MANGULAHON LOMO NI ROHA NI DEBATA”

MENGENAL DAN MELAKUKAN KEHENDAK TUHAN

I.       Patujolo.

Buku Mateus, ima na sinurathon ni si Mateus sada sian sampulu dua sisean ni Jesus. Ulaonna uju so mangihuthon Jesus, ima songon sijalobeo di Kapernaum. Hombar tu konteks panuraton ni buku on, ima tu halak Jahudi. Marhite Buku Mateus on, 3 tujuan pokok Teologi manang Pangajarion/Dogma na naeng sipatuduhon ima, Jesus i do Mesias jala hataridaan/penggenapan angka panurirangon di Padan Na Robi; pabotohon taringot parngoluon ni Jesus di hadirionNa songon manisia; patuduhon songon dia do rumang ni parngoluon ni halak Kristen na sasintongna di tonga-tonga parngoluon siganup ari. Ala di hatihai, godang halak Jahudi na so manjalo pangajarion ni Jesus tarlumobi manulak Jesus songon Mesias dohot hataridaan panurirangon di Padan Na Robi, tarlumobi angka golongan intelektual (sintua ni malim) ni Jahudi na memiliki kedudukan di pemerintahan. Marhite hatorangan on, asa boi lam taida jala tasigati angka dia na laho sidohonon ni turpuk on tu hita saluhutna, tarlumobi asa mangantusi hita di parsuruon ni Debata.

II.    Hatorangan ni Turpuk

Turpuk Mateus 21 : 23-32 on, patorangkon ganggu ni roha/keresahan di angka sintua ni malim di bagas joro, alana songon malim nasida, marhite angka malim do dipasahat pelean tu Debata. Diida angka malim i, haroro ni Jesus, gabe lam torop na mangihuthon Jesus. Jala terjadi ma perdebatan ni Jesus dohot angka sintua ni malim di bagas joro, ala dirajumi nasida dang hea dibege nasida saluhut angka hata pamodaion na nidok ni Jesus tu nasida. Ido umbahen gabe sogo rohani angka sintua ni malim i, jala naeng manjehehon Jesus.

Ayat 23 : Jadi dung bongot Ibana tu bagas joro i lao mangajri disi. .......................,”huaso dia dipangasahon Ho?”. Adong piga hal na mandasori angka sintua ni malim manungkun Jesus songon i, na parjolo : dibongoti Jesus huta Jerusalem marhite na hundul di halode (21 : 1-11), jala tudos songon sahalak raja do dibaen angka halak naung mangihuthon Ibana, dipapujipuji/diolophon songon raja. Na paduahon : dipamalum Jesus na mapitung dohot na lumpuon (21 : 14). Na patoluhon : dipaias Jesus bagas joro (21 : 12-13). Na paopathon : i ma mangajari di bagas joro (21 : 23). Ala tangkas diboto angka sintua ni malim taringot asal-usul ni keluargaNa, i ma anak ni si Josep si tukang hau (sosial). Songon anak tukang hau, sungkun-sungkun nasida sian dia do ro angka saluhut na hinatahon ni Jesus dohot na pamalumhon na marsahit. Umbahen i dilehon nasida sungkun-sungkun tu Jesus, taringot sian dia haroro ni huaso na adong di Jesus, dohot ise na mangalehon huaso i.

Ayat 24 - 27 : ndada langsung dialusi Jesus sungkun-sungkun ni angka sintua ni malim i, alai dilehon syarat andorang so dialusi, asa dialusi nasida sungkun-sungkun ni Jesus (ayat 25). Boasa disungkun Jesus taringot pandidion na pinatupa ni si Johannes? Ala si Johannes do na mandidi Jesus, jala diauhon si Johannes do Jesus i Anak ni Debata (Joh. 1: 32-34). Huaso ni si Johannes dohot huaso na adong di Jesus i ma na marharoroan sian Debata. Humalaput do angka sintua ni malim jala pola do diskusi angka sintua ni malim i lao mangalusi sungkun-sungkun ni Jesus, ala boi do sungkun-sungkun i mambahen terganggu kenyamanan nasida songon na marhuaso di bagas joro, sotung gabe dang di haporseai be nasida songon sintua ni malim, umbahen dialusi nasida “ndang huboto hami i”, gabe umbiar nasida tu jolma, sian Debata.

Ayat 28 – 32 : On ma dalan ni Jesus, lao pasingothon angka halak Parise, uluan sintua ni malim dohot angka siboto surat, marhite umpama (ayat 28-30). Marhite umpama i, naeng dipatorang Jesus angka ise ma halak na patut bongot tu Harajaon ni Debata. alai di ida Jesus nunga tung lumlam jala balik pangajarion nasida tu angka ruasna. Pangantusion nasida, angka sijalobeo, angka boru na jahat, dohot angka na asing dang boi bongot manang manjalo haluaon, ala dinaggap nasia halak na di paduru. Nangpe sasintongna disadari angka sintua ni malim, siboto surat i do ulaonna lao mangajari angka hasintongan ni Debata dohot manogunogu halak na mangulahon dosa asa ditadingkon. Alai dang diulahon nasida manogunogu angka na mangulahon dosa, lobi sian i dang nasida mangantoi angka pardosa. On ma nuaeng na naeng di patigor Jesus dohot pasingothon angka sintua ni malim i. Di soarahon Jesus do pertobatan/hamumulak ni roha tu angka halak na mangulahon dosa manang parjahat. Hasangapon di portibi on do na dilului angka sintua ni malim, siboto surat dohot angka parise i.

Marhite umpama i, naeng dohonon ni Jesus songon halak pardosa, tumagon sai hira na maol mandok olo di hamubaon ni roha, alai diulahon di ngoluna, sian halak niida songonna badia jala hira na mangoloi Tuhan i ,alai hot ngoluna dibagasan dosa.

III. Sipahusorhusoron / Parsuruon

·         Ganup minggu do hita manjalo pangajarion marhite Hata ni Debata di gareja, alai olo do tong talaosi angka Hata ni Debata. ala memang dang boi tagamon so mardosa hita di ngolunta, alai adong ma nian panolsolion dohot hamubaon ni rohanta. Ido umbahen di partording ni Kebaktian HKBP adong “Patik“ dohot “Manopoti Dosa”, Patik i gabe dalanta ma i mamboto angka hajahatonta naung taulahon, jala Manopoti Dosa dalanta manolsoli angka pangalahonta na so denggan. Dipasingkop muse marhite “Bagabaga ni Debata Taringot Hasesaan ni Dosanta” sian tangkas tatanda Debata parasiroha, sai ditogutogu do hita tu hasintonganNa, lambat tarrimas do Debata marnida hajahatonta, ala dihalungunhon Debata dope hamumulak ni rohanta sian hajahaton ni dosanta (Epistel : Psalmen 25 : 1 – 9).

·         Jala turpuk on, gabe pasingothon hita angka pangula ni huria (Pandita, Guru Huria, Biblevrouw, Diakones, Evangelis, dohot Sintua, asa mangulahon ulaonta hombar tu Poda Tohonanta be. Asa unang songon sintua ni malim di turpuk on hita, na mangalului hasangapon di tonga-tonga panghobasion i. alai ingkon ulaonta ma manogunogu ruas ni huria na dibagasan hagaleon ni partondion dohot na mandao sian Tuhan i.

·      Marhite turpuk on, naeng diondolhon Jesus halak na mangoloi hamubaon ni roha jala mangulahon dibagasan parsitutuon jala ndada holan di pamangan sambing di hatahon, sasintongna i ma halak naung jumolo bongot tu harajaon ni Debata. Amen

                                                                         C.Pdt. Joki Manaek Manalu, S. Th

                                                                  HKBP Pakpahan, Ressort Pangaribuan 

                                                                  Distrik II Silindung