Bahan Jamita Minggu “LETARE”, 11 Maret 2018

Evangelium : Johannes 15 : 9 - 17

HKBP Pakpahan Ressort Pangaribuan

v  Huria na hinaholongan dibagasan Tuhan Jesus Kristus...

Ganup halak ditompa Debata adong sada hal na tangkas lao mananda sasahalak jolma. Isaranna rupani molo secara fisik adong landongna, ganjang obukna, mancung parnianggoanna dohot lan na asing. Jala molo sian kepribadian rupani boi taida sian pangahona burju do manang jungkat. Jala ido na naeng idaonta marhite turpukta di tingki on. Aha do naboi idaonta songon ciri-ciri khusus sian Tuhanta Jesus Kristus? Tontu dohononta ma “Holong”, holong do na binoan Jesus tu portibi on, holong do na diondolhon Jesus di pardalanan ni ngoluNa. Alai tutu naeng lam tangkas rimanganta di Minggu Letare on, boasa ingkon gabe halak parholong hita? Jala angka dia do, ise do sihaholonganta di ngolunta on? Songon halak naung tinobus ni Kristus, songon dia do tutu panghaholongionta tu ganup halak tarlumobi tu dirinta sandiri? Pangajarion ni Jesus di turpuk on i ma taringot tu “na masihaholongan”, on parsuruon/perintah songon tanda ni halak naung sangkambona dohot Kristus.

v  Huria na hinaholongan dibagasan Tuhan Jesus Kristus...

·         Angka naung manda Jesus, ingkon ma mian dibagasan holong naung pinasahat ni Jesus tu angka na porsea. Tangkas diondolhon Jesus tu angka siseanNa di turpuk on, asa mangaradoti PatikNa, dia ma na gabe patik/perintah ni Jesus, ima mangaradoti Holong, ai didok do di 1 Joh. 4 : 19 “marroha holong ma hita, ala Ibana jumolo manghaholongi hita”. Haroro ni Jesus tu portibi on ndada lao pasoadahon Patik Ni Debata na tu bangso Israel, alai naeng pasingkophon Patik ni Debata. Holong ndada holan sebatas ungkapan sian roha/perasaan, alai holong ima sada tindakan na bersifat aktif. Tangkas do panghaholongi ni Jesus tu hita, i ma marhite Silang gabe gabe dalan haluaon manobus jolma pardosa. Panaonon ni Jesus i ma tanda ni holongNa tu hita.

·         Holong ndada na ro sian jolma i sandiri, alai holong na marharoroan sian Debata do. Debata do nampunasa holong i, umbahen tangkas ma gabe rimanganta dang adong dalanna hita dang manghaholongi donganta jolma tung pe asing haporseaonna. Jala unang ma tahaholongi donganta ala adong na tabuat sian ibana, ala holong ndada ingkon manjalo balos sian donganta na asing, na marlapatan unang mansohot holong ni rohanta mambahen na denggan nangpe dihosomi hita. Halak na sai tongtong mian dibagasan Debata do na tau manghangoluhon holong di ngoluna. Ido umbahen didok Jesus “alengalengku ma hamu molo diula hamu na Hupatikhon i tu hamu” ay. 14.

·         Molo pe marparbue ngolunta on marhite holong ni roha, unang ma gabe ginjang hadirionta, unang ma asa dipuji halak hita. Ndada adong saotik na ture na taula molo so Debata na mamasumasu ngolunta on. Molo disuru Debata hita asa marparbue, asa tongtong Tuhan i na marsangap di parbue ni ngolunta i. ingkon tangkas pangantusionta, na Debata do dibagasan Tondi Parbadia mangula di ngolunta marhite pangoloionta tu Ibana. Hataridaan ni holong na sintong boi do idaonta di 1 Korint 13 : 4 – 7, jala hataridaan ni holong ingkon tarida ma sian na olo hita sai tongtong manesa hasalaan ni donganta (Mat. 18 : 21)

v  Huria na hinaholongan dibagasan Tuhan Jesus Kristus...

·         Di Minggu Letare on, ditogihon do hita asa Marlas ni roha. Marlas ni roha ma hita ala nunga dihaholongi Debata hita marhite AnakNa Jesus Kristus. Nangpe hamatean do silang i, alai marhite silang i do gabe jaloonta las ni roha di haluaon na binoan ni Jesus tu portibi on. Nunga patar holong ni rohani Kristus tu hita, antong tapangido ma gogo na sian Ibana lao margogoihon hita asa marparbue ngolunta dibagasan na masihaholongan...Marlas ni roha ma hamu, ala dihaholongi Debata do hita marhite Silang ni Kristus....Amen.

C.Pdt. Joki Manaek Manalu, S. Th

HKBP Pakpahan Ressort Pangaribuan.