BAHAN SERMON HKBP RESSORT PANGARIBUAN                                             

MINGGU ESTOMIHI, 11 Februari 2018

Evangelium    :   1 MUSA 12 : 1 - 9                                    

“DIPASUPASU ASA GABE PASUPASU”

DIBERKATI UNTUK MENJADI BERKAT

I.       Patujolo.

Turpuk on, i ma barita panjouon ni Debata tu si Abram asa bungkas sian tano hagodanganna, sian tano hatubuanna, dohot sian tano ni amana tu tano na laho sipatuduhon ni Debata. Dang dipaboa Debata dope tudia tano sitopoton nasida i, alai dibagasan haunduhon do dioloi si Abram panjouon ni Debata. Marhite si Abram naeng ma saut sangkap ni Debata tu saluhut portibi on, dia ma i ima marhite padan ni Debata di panjouon jala parsuruon ni Debata tu si Abram na bahenon ni Debata ma si Abram gabe sada bangso nabolon, jala bangso na tarpasupasu. Marhite panjouon dohot parsuruon ni Debata tu si Abram, tontu sahat do panjouon i nang tu hita di tingki on. Asa boha do hita manghangoluhon panjouon ni Debata marhite ngolunta naung dipasupasu, jala hataridaan ngolunta gabe pasupasu tu humaliangta.

II.    Hatorangan.

Dipillit jala diparade Debata do si Abram na gabe ompu ni bangso Israel, marhite na manandingkon tano hagodanganna, sian hatubuanna, jala sian bagas ni amana. Boasa dang halak na asing na dipillit Debata? marhite on naeng dipatudu Debata kebebasan marhite huasona manontuhon lomoni rohaNa lao pasauthon sangkapNa di portibi on. Jala dang ala hadirion ni si Abram, dipasahat Debata padanNa tu si Abram, alai alani haunduhonna dibagasan haporseaon mangoloi Debata..

Ayat 1 – 3, on ma panjouon dohot parsuruon ni Debata tu si Abram. “bungkas ma ho sian tano hagodanganmu, dohot sian hatubuanmu, dohot sian bagas ni amam...”ala di hatiha i, amana si Tara na manomna ganaganaan (Jos. 24 : 2). Marhite i ma, didok Debata asa bungkas sian tanon hagodangan, dohot hatubuan, dohot sian bagas amam, ala dang adong haluan dibagasan parmudaron. Manang boha pe ringkot ni parmargaaon dohot ihot-ihot ni mudar na asing dang adong parhitean haluaon sian i, asa dung i patuduhon ni Debata ma bagabaga tu hangoluan na imbaru tu si Abram.

·         Bungkas maninggalhon bagas ni amana, tontu ingkon tadingkononta sude angka arta na sian amana (warisan). Ahama sipangasahononna dung bungkas sian jabu ni amana i?? dison ma dipatuduhon Debata bagabagaNa tu si Abram “Hubahen pe ho gabe bangso na bolon, jala pasupasonHu ma ho....”. Molo didok manghaporseai bagabaga ni Debata, ndada sada ulaon na neang, ingkon dibagasan haporseaon na sintong lao manghaporseai bagabaga ni Debata di ngolu ni angka na porsea.

·         Molo marnida keadaan ripe ni si Abram ima si Sarai, maol do tarjalo roha panjouon ni Debata na gabe parhitean ni pasupasu si Abram tu torop bangso, siala tardok keluarga na marsak do si Abram dohot si Sarai, ai na hol do si Sarai ala soadong tubuna. Ala molo sian pamerenganta, halak na tarpasupasu i ma halak na sangap, na mora jala na gabean di pinompar. Marhite situason on, naeng idaonta asing do sangkap ni jolma sian sangkap ni Debata, ndang hadodoan jolma angka sangkap ni Debata. Naeng dipatuduhon Debata, halak na soadong be panghirimonna, i do na dipillit Debata gabe parhitean ni panghirimon na imbaru tu torop bangso.

·         “jala pasupasuonHu angka na mamasumasu ho, jala toruonHu angka na mamurai ho,.......” on ma na gabe sada jaminan ni Debata di pardalanan ni si Abram lao manopot tano na laho sipatuduhon ni Debata, nangpe dang diboto si Abram dope tudia tano na laho sidapotononna. Ndada holan pasahathon parsuruon Debata, alai laos ihut do diramoti si Abram di pardalananna.

Ayat 4 – 6, pardalanan ni si Abram, rap dohot si Sarai dohot si Lot dibagasan pangoloion dohot pos ni roha na tangkas tu Debata, nang pe ingkon tadingkononna tano hatubuanna dohot saluhut arta ni amana. Nangpe nunga dijamin Debata ngolu nasida dipardalanan lao manopot tano na laho sipasahaton ni Debata i, alai tong diparade si Abram angka na ringkot di pardalanan nasida, ndang gabe bulus dang adong pangaradeonna. Dung dao pardalanan nasida, sahat ma nasida tu Sikhem, ndang boi pintor diingani nasida luat i, ala nunga adong halak Kanaan na mian disi. Dison ma diuji Debata hasabaron dohot hasatiaon ni si Abram, jala tongtong do si Abram mardalan marhite mata haporseaonna tu Debata.

Ayat 7 – 9, dung diliati si Abram tano di Sikhem sahat tu tombak More, hape diida nunga diingani halak Kanaan tano i, dang jumpangna tano na kosong. Dison marpadan Debata ay.7 “tu pinomparmu ma lehononHu tano on”, marhite padan ni Debata dipajongjong si Abram ma sada langgatan ni Jahowa, na gabe inganan partangiangan lao pasahathon dirina (ala di tano Kanaan i godang jongjong angka inganan partanginagan tu debata baal, ala debata Baal do debata ni halak Kanaan uju i)

III. Sipahusorhusoron / Parsuruon

·        Marhite haporseaon dohot pangoloion ni si Abraham taboto ma nuaeng manang songon dia panjouon ni Debata di halak na porsea dohot di HuriaNa di sude portibi on. Dijou do hita mangihuthon si Abraham marhite haporseaon dohot pangoloion. Dijou do hita bungkas sian sude nasa na mangihoti rohanta sian pangolaho na robi i, i ma mudar dohot sibuk. Dijou do hita mangolu songon halak na merdeka diadopan ni huaso paradaton dohot parmargaon. Dijou do hita pasangaphon Debata marhite na manghaporseai bagabagaNa atik pe maralo bagabaga i tu pingkiranta sandiri. Jala dijou do hita gabe parhitean ni pasupasu ni Debata tu sude bangso, ndada holan tu dirinta sandiri.

·      Aha do siparadeonta mangihuthon turpuk on? Parrohaon na sintong dohot pangoloion di panjouon ni Debata di ngolunta marhite ragam ulaon naung dipasahat Debata tu hita ganup marsadasada. Manghamuliatehon denggan basa ni Debata ni ngolunta,asa dung i marparbue ma ngolunta di pardalanan ni ngolunta. Ndada holan di hita mian pasupasu ni Debata, alai ingkon sahat ma tu angka donganta mangharingkothon dalan ni pasupasu.

·        Sangkap ni Debata, ndang mamereng: Hamoraon, Hagabeon dohot Hasangapon di portibion. Molo di halak Batak, mansai paltak do mual ni pasupasu, i ma: Hula-hula dohot angka na tua-tua. Jala pasupasu na tinanda ni halak Batak, i ma: Hamoraon, Hagabeon dohot Hasangapon. Molo ndang jumpang na tolu on di ngolu ni halak Batak, ndang sintong ibana na tarpasupasu. On ma na salah jala porlu sipadengganonta. Debata do mual ni pasu-pasu i, asa mamora ma hita di parrohaon dohot holong ni roha, marhasangapon ma hita ala haserepon ni rohanta, ndada alani hamoraon, hagabeon dohot hasangapon umbahen tardok hita tarpasupasu. Alai ahalak na mangolu dibagasan pangoloion mangulahon lomo ni roha ni Debata, i ma halak na tarpasupasu.. Amen,,,,,

    Ca. Pdt. Joki Manaek Manalu, S. Th

    HKBP Pakpahan Ressort Pangaribuan

BAHAN SERMON MINGGU SEXAGESIMA, 4 Februari 2018

Evangelium    :   LUKAS 8 : 9 - 15                                                 

MANANGIHON JALA MANGULAHON HATA NI DEBATA

MENDENGAR DAN MELAKUKAN FIRMAN ALLAH

I.       Patujolo.

Sian tolu buku Evangelium (Mateus, Markus, Lukas), godang do angka pangajarion na pinasahat ni Jesus tu angka sisean nang torop jolma marhite angka perumpamaan /umpama, marhite i boi ummura antusan ni halak na mambege pangajarion ni Jesus. Turpuk jamita di minggu on, i ma Umpama Taringot tu Panabur. Tontu boi do sungkun-sungkun rohanta, ise do panabur i ? aha do lapatan digombarhon Jesus Boni i, adong na mamiltik tu dalan, na madabu tu batu, na madabu tu parsihupian, dohot na madabu tu tano na denggan. Marhite na tarsurat di turpuk on, boni i, i ma Hata Ni Debata. Alai, adong do gombaran na asing na lao idaonta lao pabagashon pangantusionta taringot boni i dohot taringot huaso ni Hata Ni Debata di ngolu ni halak na porsea jala na tongtong mameop Hata Ni Debata di pardalanan ni ngoluna.

II.    Hatorangan.

Marhite turpuk on, naeng dipatorang tu hita taringot hinaarga ni Hata ni Debata di parngoluonta halak na porsea. Asa tangkas songon dia do boni / Hata ni Debata gabe hagogoon di angka na porsea di Ibana, jala lam mananda hita di panabur boni i.

Ayat 9 – 10, uju na disungkun siseanNa taringot lapatan ni umpama i, alus ni Jesus na parjolo ala marhahonaan ma i tu sungkun-sungkun di ayat 10 “........ pamotoan di hahomion ni harajaon ni Debata”, dung i pe dipatorang taringot umpama i. Molo tajaha ayat 10 i, maol do antusan pamotoan di hahomion ni harajaon ni Debata. Didia do hahomion na nimaksud turpuk on? Hahomion ni harajaon ni Debata, i ma di Jesus i sandiri, tahaporseai Debata na tuat tu potibi on marhite Jesus, umbahen i do didok hahomion do harajano ni Debata. Holan marhite mata haporseaonta do boi tahatindangkon harajaon ni Debata. marhite ayat 10 on, dilehon do tu angka siseanNa huaso/karunia lao mamboto hahomion i marhite mata ni haporseaon naung dibungka Jesus di nasida. alai di angka natorop na adong disi, dibahen Jesus ma umpama patorangkon harajaon ni Debata, ala dang ditanda nasida jala dang diantusi dope harajaon ni Debata na binoan ni Jesus sandiri tu portibi on.

Ayat 11 – 15, manguhuthon na tarsurat di turpuk on, boni i, ima Hata ni Debata. Alai sian pamerengan na asing, boni i manggombarhon halak naung manjalo Hata i, jala angka “halak” boi gabe gombaran inganan lao manaburhon boni hombar di turpuk on. Jala panabur di turpuk on, ima :

1.    Debata / Jesus Kristus sandiri na mamboan HataNa tu portibi on.

2.    Huria / gereja lao manaburhon Hata ni Debata tu angka ruas marhite parjamitaon

Digombarhon do dibagasan turpuk on opat (4) respon ni hita jolma di na manjalo Hata ni Debata :

  1.  Boni na mamiltik tu dalan. Di na disaburhon boni i, alai deba sian boni i mamiltik ma tu dalan i. Tubu do boni i alai gabe hona degean jala laos mate. Manggombarhon roha ni jolma na botulbotul tarkunci tu Hata ni Debata, tartutup jala manulak.

  2.  Boni madabu tu tano na marbatubatu. Ima tano na tipis na adong di atas ni angka batubatu. Koring do tano on jala ndang pola napu. Tutu tubu do anggo boni i ditano i alai ndang manahan, dung i laos mate. Manggombarhon roha ni jolma na olo manjalo Hata ni Debata, alai ndang diantusi jala ndang olo mangguruhon. Ujungna ndang boi dihilala hagogoon ni Hata ni Debata. Asa holan ro hamaolom na gelleng, nunga talu ibana.

 3. Boni na madabu tu parsihupian.  Rap tubu ma boni i dohot sihupi i. Alai dung lam balga dipapisatpisat ma boni i ujungna laos mate. Manggombarhon roha ni jolma na sai giot mamingkiri haportibionon. Gabe ndang adong be inganan ni Hata ni Debata dibagasan rohana, pikiranna dohot ngoluna. Dang Debata be dipangasahon di ngoluna, jala mago ma pos ni roha.

 4. Boni na madabu tu tano nadenggan. Ditano sisongon on denggan ma boni i tubu sahat tu namangalehon parbue saratus hali lompit. Manggombarhon roha ni jolma na mambege, manghangoluhon jala mangulahon Hata ni Debata di ngoluna. Nang pe ro angka hamaolon, parungkilon, dohot elaela ni portibi di ibana, tongtong do dibagasan habengeton, hasatiaon dohot marposniroha di Debata ngoluna.

III. Sipahusorhusoron / Parsuruon

Marragam do angka na masa naung tabolus dohot angka na naeng sibolusonta dope dibagasan ngolu on. Angka na masa i sipata patubu arsak ni roha, jut ni roha, pandelean, sahit bahkan hapogoson. Alai disisi na asing boi do patubu las ni roha dohot olopolop. Na pasti manang dia pe na masa dibagasan ngolunta, sian i do tarida dia do na gabe ojahanta lao mangadopi angka na masa i. Tontu, halak na mangolu dibagasan Hata ni Debata margogo jala marposniroha holan tu Debata do, jala tongtong dihamauliatehon saluhut pangaramotion ni Debata di ngoluna. Ala sude na masa dibagasan ngolunta on dalan ni Debata do laho mamanghulingi hita. RONAL REAGEN (Presiden Amerika ke-40) mandok “Di dalam satu Kitab ini, yaitu Alkitab, terdapat seluruh jawaban bagi masalah yang kita hadapi saat ini, kalau saja kita mau membaca dan mempercainya”.  

Ca. Pdt. Joki Manaek Manalu, S. Th
HKBP Pakpahan, Ressort Pangaribuan
Distrik II SILINDUNG